Компани 2024 оны 04-р сарын 20-ны өдөр ээлжит хувьцаа эзэмшигчдийн хурлаа зохион байгуулсан бөгөөд шинээр нээгдэж буй MFC 2.0 үйлдвэрийн төслөө танилцуулсан байна.

🏭Үйл ажиллагаа: ногдол ашиг тараахгүй, гэхдээ...

Монос Хүнс ХК нь 2012 онд Монос Фарм ХХК-аас өрх тусгаарлаж албан ёсоор үүсгэн байгуулагдсан. Улмаар 2019 онд IPO амжилттай хийж нийт 4,004 хувьцаа эзэмшигчтэйгээр ХК болж байсан бол өнөөдөр улам өнөр өтгөн болж 12,800 хувьцаа эзэмшигчтэй болоод байна. Энэ удаагийн хувьцаа эзэмшигчдийн хурлаар "Монос Хүнс" ХК-ийн ТУЗ-ийн 2023 оны 2 дугаар сарын 19-ний өдрийн хурлаар шийдвэрлэсэн ногдол ашиг тараахгүй байх саналын тухай хэлэлцэж, олонхийн саналаар тус санал дэмжигдсэн байна.

Тухайн компани тайлант жилд цэвэр ашигтай ажилласан ч ногдол ашиг тараахгүй байхаар шийдвэрлэж болох бөгөөд энэ нь ихэвчлэн үйлдвэрлэлийг өргөтгөх, хүчин чадлаа нэмэх зорилгоор хийгддэг байна.

"Монос Хүнс" ХК нь анх үүсгэн байгуулагдахдаа 12 нэр төрлийн бүтээгдэхүүн үйлдвэрлэж байсан бол эдүгээ 11 брэндийн 54 төрлийн бүтээгдэхүүнийг үйлдвэрлэж Монгол орны 21 аймгийн нийт 13,000 цэгт түгээж байна. Мөн ОХУ руу “Творожное Драже” буюу ааруултай үрлээ экспортлохоос гадна Киргиз улсын Лекарь байгууллагатай хамтран 20 нэр төрлийн бүтээгдэхүүнээ энэ оноос эхлэн тус улсад борлуулж эхлээд байгаа аж.

💸Санхүүгийн голлох үзүүлэлтүүд:

Компанийн нийт хөрөнгийн 50.6 хувийг эргэлтийн хөрөнгө үүний дотор 70.3 хувийг мөнгө, түүнтэй адилтгах хөрөнгө эзэлж байна. Санхүүгийн эх үүсвэрийн 71.5 хувийг өр төлбөр бүрдүүлсэн. Өмнөх оны мөн үетэй харьцуулвал нийт хөрөнгө 111.8 хувь, нийт өр төлбөр 187.9 хувиар тус тус өссөн үзүүлэлттэй байна.

Мөнгө, түүнтэй адилтгах хөрөнгө болон урт хугцааат өр төлбөр голлон өссөн нь 93 хувийн гүйцэтгэлтэй байгаа MFC 2.0 төсөлтэй холбоотой байна. Төслийг Ногоон зээл, ЗГ-ийн хөнгөлөлттэй зээл болон өөрийн үндсэн үйл ажиллагааны санхүүжилтээр санхүүжүүлж байгаагаа ТУЗ-ийн дарга Х.Ананд хурал дээр дурдсан юм.

Компани 2023 онд 31.7 тэрбум төгрөгийн борлуулалтын орлого, 3.5 тэрбум төгрөгийн цэвэр ашигтай ажиллаж төлөвлөсөн зорилтоо 96%-аар биелүүлж, өмнөх оноос борлуулалтын орлогоо 12 хувиар, цэвэр ашгаа 9 хувиар өсгөж чаджээ.

Энэ онд төслийн үр нөлөөгөөр борлуулалтын орлогоо өнгөрсөн оныхоос давуулан биелүүлж цэвэр ашгийн өсөлтийг 50%-д хүргэх, өрийн дарамтанд оролгүйгээр ЗЭТ-ийг хэвийн явуулах болон санхүүгийн болоод удирдлагын нарийн бүтэцтэй ажиллаж байгаа гэдгийг онцлов.

Онцлох мэдээлэл:

• Импортыг орлох CRAFT, VITA 500, ISOTONIC бүтээгдэхүүнүүдийг зах зээлд шинээр гаргана.
• Экос усны савыг илүү нимгэн болгож үйлдвэрлэлийн зардлыг бууруулах болон байгаль орчинд ээлтэй болгохоор ажиллаж байна.
• АНУ болон Австралийн зах зээлд Увдист брендийн өтгөрүүлсэн барагшуныг нийлүүлэхэд бэлэн болоод байна.
• Төв Азийн зах зээл рүү нэвтрэхээр ажиллаж байна.