"Мандал ирээдүйн өсөлт ХОС" ХХК-ийн хувьцаа эзэмшигчдийн хурал 2024 оны 4 сарын 22-ны өдөр 51.2% ирцтэйгээр болж өндөрлөлөө. Хурлаар сангийн 2023 оны үйл ажиллагаа, санхүүгийн тайланг батлах, ТУЗ-ийн дүгнэлт батлах мөн татварын дараах цэвэр ашгаас ногдол ашиг тараах эсэх талаарх ТУЗ-ийн гаргасан шийдвэрийг танилцууллаа.
“Мандал Ирээдүйн Өсөлт Хамтын ХОС” ХХК нь эрсдэлийн удирдлагын нэгдсэн тогтолцоог хэрэгжүүлэх замаар олон нийтээс татан төвлөрүүлсэн мөнгөн хөрөнгийг өөрийн бодлогын баримт бичиг болон хууль тогтоомжийн хүрээнд, мэргэжлийн түвшинд үр ашигтай хөрөнгө оруулалт хийх замаар үнэт цаасны зах зээлээс олсон өгөөжийг хөрөнгө оруулагчдадаа хүртээх зорилго бүхий компани юм.
Хөрөнгө оруулалтын үйл ажиллагаа:
Цэвэр хөрөнгийн үнэ цэн нь хөрөнгө оруулалтын сангийн хувьд нэгж эрхийн үнийг тодорхойлох гол хүчин зүйл байдаг ба "Мандал Ирээдүйн өсөлт ХОС"-ийн хувьд тус үзүүлэлт 2023 оны 1 сарын 1-ний өдрийн байдлаар 1,105.84 төгрөг байсан бол 2023 оны 12 сарын 31-ны өдрийн байдлаар 1,207.67 төгрөг болж өссөн.
| Цэвэр хөрөнгийн үнэ цэн | Нэгж эрхийн цэвэр хөрөнгийн үнэ цэн | Нэгж эрхийн ханш /2023.04.24/ |
|---|---|---|
| 60.3 тэрбум ₮ | 1207.67₮ | 800₮ |
Компанийн нийт хөрөнгө 2023 оны 12 сарын 31-ний байдлаар өмнөх оноос 4.6 тэрбум буюу 8 хувиар нэмэгдэж 60.3 тэрбум төгрөгт хүрсэн байна. Хөрөнгө оруулалтыг багцаар салгавал 38% буюу 22.9 тэрбум төгрөгийг хадгаламж, 32% буюу 19.3 тэрбум төгрөгийг бонд, 30% буюу 18.1 тэрбум төгрөгийг хувьцаанд хөрөнгө оруулсан. Хувьцааны багцад нийт хувьцааны 51% нь арилжааны банк болох Хаан банк, Голомт банк, Төрийн банкны хувьцаа эзэлж байгаа бол 49% нь Монголын Топ компани болох Апу, Инвескор компанийн хувьцаа эзэлж байна.
Тэдний таамаглалаар 2024 оны 6 сар хүртэл төгрөгийн ханш тогтвортой байна хэмээн таамагласан тул ам.долларын хөрөнгө оруулалтыг бууруулж, нийт хөрөнгө оруулалтын багцын 1 хувийг ам.доллар болгосон. Мөн ирэх 2024 онд арилжааны банкны хувьцааг нэмэгдүүлж, нийт хөрөнгө оруулалтад хувьцааны эзлэх хувийг нэмэгдүүлэхээр төлөвлөсөн байна.
Сангийн хөрөнгө оруулалтын бодлогын баримт бичигт өөрчлөлт оруулав.
Хөрөнгө оруулалтын сангийн үйл ажиллагаатай холбоотойгоор 2023 онд хэд хэдэн өөрчлөлт орсон. Нөлөөлөхүйц гол өөрчлөлт болох "Хөрөнгө оруулалтын менежментийн үйл ажиллагаа эрхлэх тусгай зөвшөөрлийн журам"-д орсон активт тавигдах шаардлагад орсон өөрчлөлтийн дагуу "Сангийн хөрөнгө оруулалтын бодлогын баримт бичиг"-т нэмэлт өөрчлөлт оруулах шийдвэр гарлаа.
| Хамтын ХОС-ийн активт тавигдах шаардлага | Хуучин журам | Шинэ журам |
|---|---|---|
| Хувьцаа | 60% хүртэл | 60% хүртэл |
| Өрийн хэрэгсэлд | 60% хүртэл | 70% хүртэл |
| Нэг компанийн гаргасан эсхүл түүнд холбогдох этгээдийн хувьцаа, нийтэд санал болгосон өрийн хэрэгсэлд оруулах хязгаар | 20%-с хэтрэхгүй | 30%-с хэтрэхгүй |
| Нэг компанид оруулж болох сангийн нийт хөрөнгийн хязгаар | 10%-с хэтрэхгүй | 25%-с хэтрэхгүй |
| Нөлөө бүхий банкны хувьцаанд сангийн нийт хөрөнгөө оруулах хязгаар | 20% хүртэл | 40% хүртэл |
2031 он гэхэд нийт цэвэр хөрөнгийн үнэлгээг 215 тэрбум төгрөгт хүргэнэ.
"Мандал Ирээдүйн өсөлт ХОС"-ийн ТУЗ-ийн 2024 оны 2 сарын 19-ний өдрийн 1 дугаарт тогтоолоор компанийн ашигт ажиллагааг нэмэгдүүлэх зорилгоор 2023 оны цэвэр ашгаас хувьцаа эзэмшигчдэд ногдол ашиг хуваарилахгүй байхаар шийдвэрлэсэн.Учир нь компани нь 2021 онд үүсгэн байгуулагдсан ба 2031 он хүртэл үйл ажиллагаа эрхлэх боломжтой юм. Хөрөнгө оруулалтын багц нь макро эдийн засагтай шууд холбоотой тул цаашид хувьцааны зах зээл өсөлттэй байх таамаглалыг гарган, 10 жилийн хугацаанд хамгийн өндөр өгөөжтэй байх хөрөнгө оруулалтыг хийж нийт цэвэр хөрөнгийн үнэлгээг 215 тэрбум төгрөгт хүргэх зорилттой байгаа юм.